ခြောက်ခမ်းသွားသော အိပ်မက်မြစ် (သို့) ဦးဇော်ဇော်သို့ အိပ်ဖွင့်ပေးစာ

ခြောက်ခမ်းသွားသော အိပ်မက်မြစ် (သို့) ဦးဇော်ဇော်သို့ အိပ်ဖွင့်ပေးစာ
~~~~~~~~~~~~~~~~~~~~~~~~~~~~~~~~~~~~~~~
သို့...
ဦးဇော်ဇော်
ဥက္ကဌ
မြန်မာနိုင်ငံဘောလုံးအဖွဲ့ချုပ်

ဦးဇော်ဇော်.. ဒီစာကိုရေးရတာ ပြီးခဲ့တာတွေကို ပြန်ပြီးချေးခြောက်ရေနှူးတာမဟုတ်ဘူးဆိုတာ အရင်ဆုံးပြောချင်ပါတယ်..။ ကျနော့်ရင်ထဲမှာ ခံစားနေရတဲ့ခံစားချက်တွေ သက်သာလိုသက်သာငြား ရင်ဖွင့်ပေးစာတစောင်ပါ..။ ဘယ်သူ့ကို ခေါင်းစဉ်တပ်ရမလဲဆိုတာ မဝေခွဲနိုင်လို့ MFF ဥက္ကဌဆီသို့ ခေါင်းစဉ်တပ်လိုက်တာ..။ မနေ့ညကဖြစ်တဲ့ကိစ္စမှာ တာဝန်အရှိဆုံးပုဂ္ဂိုလ်က ပတ်ဆောင်ဟွာ..။ ဒါပေမယ့် ကျုပ်တို့အားလုံးကို မြောင်းထဲပို့လိုက်တဲ့သူက ခုချိန်မှာ ဘာကောင်မှမဟုတ်တော့တဲ့အတွက် သူပြီးရင်တာဝန်အရှိဆုံး အဖွဲ့အစည်းကို ခေါင်းတည်ပြီး ရေးလိုက်တာ..။

ပွင့်ပွင့်လင်းလင်း ၀န်ခံရရင် ကျနော်အစောကြီးကတည်း မြန်မာဘောလုံးအသင်း ရွှေရဖို့ကို မမျှော်မှန်းထားဘူး..။ ရွှေဆုဆိုတာ အလွယ်တကူရတဲ့အရာမှမဟုတ်တာ..။ ဒါပေမယ့် အနည်းဆုံးတော့ အကြိုဗိုလ်လုပွဲ.. အခွင့်သာရင် ဗိုလ်လုပွဲဆီကိုတော့ ရောက်နိုင်လိမ့်မယ်လို့ မျှော်လင့်ထားတယ်..။ ကံအခွင့်အလမ်းရှိခဲ့ရင်တော့ အားလုံးရဲ့ မျှော်လင့်ခြင်းအိပ်မက်ဖြစ်တဲ့ ချန်ပီယံရွှေတံဆိပ်ပေါ့..။ အားလုံးရဲ့ မျှော်လင့်ချက်တွေကလည်း ဒီလိုပဲရှိနေလိမ့်မယ်လို့ ယုံကြည်ထားတယ်..။ အခုတော့ သန်းခြောက်ဆယ်သော ပြည်သူအားလုံးရဲ့ မျှော်လင့်ခြင်းအိပ်မက်တွေက မနေ့ညက နာရီပိုင်းအတွင်းမှာ ရိုက်ချိုးဖျက်ဆီးခံလိုက်ရတယ်။ Stupid နည်းပြတဦးရဲ့ Sorry ဆိုတဲ့စကားလုံးအောက်မှာ ကျနော်တို့အားလုံးရဲ့ ဂုဏ်သိက္ခာတွေဟာ မြောင်းထဲရောက်သွားတယ်..။ အဲဒီ့အတွက် တာဝန်အရှိဆုံးက နည်းပြတွေ ကစားသမားတွေနဲ့ MFF အဖွဲ့ချုပ်ပဲလို့ ကျနော်စွပ်စွဲရင် ဦးဇော်ဇော်ငြင်းချင်သလား..???

ဒီလိုပွဲကြီးတပွဲကျင်းပနိုင်ဖို့ ဘယ်လောက်နှစ်တွေကြာအောင် စောင့်ခဲ့ရသလဲ?? ဒီပြိုင်ပွဲကြီးမှာ ဂုဏ်သိက္ခာရှိရှိ ပါဝင်ယှဉ်ပြိုင်နိုင်ဖို့ ဘယ်လောက်ကြိုးပမ်းခဲ့ကြရသလဲဆိုတာ ဦးဇော်ဇော်တို့ကိုယ်တိုင် ပိုသိကြမှာပါ..။ အလားတူပဲ ကျနော်တို့ ပရိတ်သတ်တွေအနေနဲ့လည်း ဘယ်လောက်အားခဲထားကြသလဲဆိုတာ ကျနော်တို့အသိဆုံးပါ..။ ဘောလုံးပွဲကြည့်ခွင့်ရဖို့ ဘယ်လိုပင်ပမ်းဆင်းရဲကြီးစွာ ကြိုးစားအားထုတ်ရသလဲဆိုတာ ကျနော်တို့ ပရိတ်သတ်တွေ အသိဆုံးပါ..။ လူပင်ပမ်း စိတ်ပင်ပမ်းနဲ့ ငွေကုန်သံပြာဖြစ်ခဲ့ကြပေမယ့် မြန်မာဆိုတဲ့ စိတ်ဓါတ်နဲ့ တာဝန်ကျေပွန်ခဲ့ကြတယ်..။ ခုတော့ ဒါတွေအားလုံးက အလကားပဲ..။ မြန်မာဆိုတဲ့ ခေါင်းစီးကို ခုံခုံမင်မင်ပတ်ပြီး အားပေးခဲ့ရတဲ့အတွက် နောက်ဆုံးပြန်ရလိုက်တာ မျက်ရည်စတွေပဲ..။

ဦးဇော်ဇော်အပါအ၀င် မြန်မာဘောလုံးသမားတွေ တာဝန်ရှိသူတွေခံစားရတယ်ဆိုတာ ကျနော်တို့ပရိတ်သတ်တွေ ခံစားရတာထက် မပိုနိုင်ပါဘူး..။ ဘာလို့လဲဆိုတော့ ကျနော်တို့ပရိတ်သတ်တွေက မြန်မာအသင်း အောင်မြင်ခဲ့ရင် ငွေကြေးတို့ မက်လုံးတို့ဆိုတဲ့အရာတွေကို မျှော်လင့်ခွင့်မရှိသလို မျှော်လင့်ခြင်းလည်း မရှိခဲ့ကြဘူး..။ ပျော်ရွှင်ခြင်း ဂုဏ်ယူခြင်း ၀မ်းမြောက်ခြင်းဆိုတဲ့ စိတ်ခံစားမှုသက်သက်ကြောင့် အားပေးခဲ့ကြတာ..။ မနေ့ညက ဦးဇော်ဇော်တို့ ၀မ်းနည်းငိုကြွေးခဲ့ရသလို ကျနော်တို့ပရိတ်သတ်တွေလည်း ကြေကွဲ ငိုကြွေးခဲ့ရတယ်..။ နာလည်း နာကျင်ခဲ့ရတယ်..။ အတိုင်းထက်အလွန်လည်း ခံစားခဲ့ရတယ်..။ ခုဒီစာကိုရေးနေချိန်မှာတောင် ကျနော့်ရင်ဘတ်ထဲမှာ အောင့်တောင့်တောင့်ဝေဒနာ ခံစားနေရဆဲ..။

ခပ်ရှင်းရှင်းပြောရရင် မြန်မာဘောလုံးအသင်းဆိုတာ မြန်မာနိုင်ငံဘောလုံးအဖွဲ့ချုပ်ကို ကိုယ်စားပြုထားတာမဟုတ်ဘူး..။ သန်းပေါင်းခြောက်ဆယ်သော ပြည်သူတွေကို ကိုယ်စားပြုထားတာ..။ သူတို့ရဲ့အောင်မြင်မှု ကျဆုံးမှုတွေက ကျုပ်တို့နဲ့တိုက်ရိုက်သက်ဆိုင်တယ်..။ တိုင်းတပါးက နည်းပြတယောက်က ၀မ်းနည်းပါတယ်ဆိုတာ ကျုပ်တို့ပျော်ရွှင်နေသလောက်တောင် မရှိဘူး..။

ကျုပ်တို့ရဲ့ခေါင်းပေါ်မှာ မြန်မာဆိုတဲ့စာတန်းကိုစည်း ကျုပ်တို့ရဲ့မျက်နှာထက်မှာ မြန်မာနိုင်ငံအလံခပ်နှိပ် ကျုပ်တို့ရဲ့ကိုယ်ပေါ်မှာ မြန်မာဆိုတဲ့အင်္ကျီဝတ် ကျုပ်တို့ရဲ့လက်ထဲမှာ မြန်မာဆိုတဲ့အလံဝှေ့ယမ်းပြီး အားပေးခဲ့ကြတာ တခြားနေရာတွေမှာ အောက်ကျနောက်ကျဖြစ်ခဲ့ရတဲ့ ကျုပ်တို့တိုင်းပြည်ကို နိုင်ငံတကာအလယ်မှာ တနည်းနည်းနဲ့ လူရိုသေရှင်ရိုသေဖြစ်စေချင်လို့..။ အခုတော့ အားလုံးဟာ အလကားပါပဲ..။

မြန်မာအသင်းနဲ့ပတ်သက်လာရင် ကျနော်ဖိုးသိကြား မျက်ရည်ကျတဲ့အထိ ခံစားရတာ နှစ်ကြိမ်တိုင်တိုင်ရှိသွားပြီ။ အခြားအကြိမ်တွေတုန်းက ခံစားခဲ့ရပေမယ့် မျက်ရည်ကျတဲ့အထိ မဖြစ်ခဲ့ဖူးဘူး..။ ပထမဆုံးအကြိမ်က ၁၉၉၅ ဆီးဂိမ်းမှာပဲ..။ ကျနော်တို့တနိုင်ငံလုံး အားခဲထားကြတဲ့အချိန်မှာ ဗီယက်နမ်နဲ့တွေ့ မြန်မာက ၂ယောက်အထုတ်ခံရပြီး ၉ယောက် ၁၁ယောက်နဲ့ကန်ရ။ နောက်ဆုံး အချိန်ပိုမှာ ရှုံးခဲ့တုန်းကပေါ့..။ အဲဒီ့တုန်းက တကြိမ်မျက်ရည်ကျခဲ့ရဖူးတယ်..။ အဲဒီ့အချိန်က ကျနော် အထက်တန်းကျောင်းသားဘ၀ပဲ ရှိသေးတယ်..။ ဦးဇော်ဇော်ဆိုရင် မြန်မာပြည်ရဲ့ ပြင်ပမှာရောက်ချင်ရောက်နေခဲ့မှာပေါ့..။ အခုတကြိမ်မှာတော့ ပိုပြီးခံစားရတယ်..။ ကိုယ့်မြေကိုယ့်ရေမှာ ဖြစ်တဲ့အတွက်..။

အရိုးသားဆုံးဝန်ခံရရင် မြန်မာနဲ့ထိုင်းပွဲသွားကြည့်ပြီးကတည်းက ကျနော်နဲ့အတူကြည့်ကြတဲ့ ကျနော့်အကိုလို ချစ်ခင်ရသူတယောက်နဲ့ ကျနော့်ညီလိုချစ်ခင်ရတဲ့သူ သုံးယောက်သား တိုင်ပင်ထားကြပြီးသား..။ မြန်မာပွဲစဉ်တွေကို ရန်ကုန်မှာကြည့်ရှုအားပေးရတာ အားမရလို့ နေပြည်တော်အထိတက် အလုပ်အပျက်ခံပြီး လိုက်လံအားပေးဖို့ပေါ့..။ အခုတော့ ကိုညီထွဋ်ရဲ့ သီချင်းအတိုင်း ကျနော်တို့ရဲ့ အိပ်မက်မြစ်တွေက ခြောက်ခမ်းခဲ့ပြီ..။

အဲဒီ့အတွက် မြန်မာတနိုင်ငံလုံးမှာရှိတဲ့ ပရိတ်သတ်သို့ တောင်းပန်ရှင်းလင်းချက်နဲ့ အစီရင်ခံစာကို တရားဝင် ကြေငြာချက်တစုံ ထုတ်ပေးဖို့အတွက် ပြောချင်ပါတယ်..။ ဦးဇော်ဇော်အနေနဲ့ ဒီစာကိုဖတ်ခွင့်ရရ မရရ ခုလိုရင်ဖွင့်လိုက်ရတဲ့အတွက် ဖိုးသိကြားရဲ့ရင်ထဲမှာ အနည်းငယ်သက်သာသွားတဲ့အတွက် ကျေးဇူးတင်ပါတယ်..။

ဖိုးသိကြား
(မြန်မာ့ ဘောလုံးချစ်ပရိတ်သတ်တဦး)